أحسن إطلالات الشعر ليوم الفرح

كل بنت بتستنى يوم فرحها بفارغ الصبر، علشان تخطف الأنظار وتتألق بإطلالتها وفستانها.

وعلشان تسريحة الشعر تعتبر جزء كبير من إطلالة العرسة، وهي اللي بتديها شكل مثالي وأنيق، جمعنالك في المقال ده مجموعة من تسريحات الشعر بستايلات مختلفة علشان تختاري منها اللوك اللي يناسبك ويساعدك تكوني في أحسن إطلالة يوم فرحك..."

• تسريحات مختلفة للشعر الطويل والقصير:

مفيش شك إن طبيعة الشعر، وطوله هي اللي بتحدد وبتتحكم في شكل وموضة التسريحة المناسبة لكل عروسة.

فمثلًا الشعر الطويل ينفع معاه تقريبًا كل التسريحات وبيليق عليه كل حاجة وبيدي مرونة كبيرة مع كل الستايلات اللي ممكن العروسة تعملها يوم فرحها.

زي الستايلات اللي بيترفع فيها الشعر من الخلف، وزي الستايلات الانسيابية اللي فيها تموج خفيف، وكمان الشعر النص مرفوع اللي بيكون فيه ضفيرة من قدام أو على الجنب.

كلها تسريحات بتليق على الشعر الطويل.

أما بالنسبة للشعر القصير، في كثير من التسريحات اللي بتليق عليه زي التسريحة الفرنسية، اللي بيكن الشعر فيها مشدود كله للخلف، أو ممكن يتساب الشعر مفرود بطريقة طبيعية ويتزين بوردة بيضاء أو اكسسوار فضي هادي، وده بيديكي إطلالة رومانسية رقيقة.

"وفي السطور الجاية هنقولك بعض أشهر التسريحات وأكثرها استخدامًا واللي ممكن تليق مع كل شكل شعر، تقدري تختاري منها المناسب ليكي واللي يليق على شعرك علشان تظهري في أحسن إطلالة يوم فرحك..."

• تسريحات الشعر الناعمة:

زمان من فترة كانت الموضة هي التسريحات الفخمة الاكسسوارات الضخمة، لكن مع تغير الزمن تطور الموضة بقى في تبني لشكل تاني من الموضة في تسريحات الشعر، وهي موضة التسريحات الناعمة.

اللوك الهادي والتسريحات الناعمة البسيطة، أنتشرت جدًا في الفترة الأخيرة خصوصًا مع ظهور عدد كبير من المشاهير بيها.

ومن أكثر التسريحات الناعمة شهرة هي تسريحة الشعر الويفي أو المموج، اللي بيفضلها نجمات كتير في ظهورهم ومناسباتهم.

ومن الأكثر رواجًا كمان تسريحة الشعر الكيرلي المنفوش، وهي من أكثر تسريحات الشعر الناعمة شياكة وتميز.

أما لو كنتي من محبي الكلاسيكية فممكن تعملي تسريحة ديل الحصان، هتضمنلك إطلالة ناعمة وجذابة بشكل بسيط وطبيعي.
التسريحات الناعمة بيليق عليها الاكسسوارات الرومانية الهادية، الاكسسوارات البسيطة، استخدميها وكملي اللوك الناعم الأنيق ليوم فرحك.

• تسريحات فخمة (خليجية):

ومن التسريحات الفخمة والراقية اللي بتدي للعروسة لوك ملكي في فرحها هي التسريحات الخليجية واللي على عكس هدوء التسريحات الناعمة فهي بتعتمد بشكل كبير على الاكسسوارات.

ومن أجمل التسريحات الخليجية وأكثرها فخامة، هي اللي بيتم فيها رفع الشعر بالكامل إلى الخلف على شكل كعكة وربطه بمشبك أنيق.

وفي كمان تسريحة الضفيرة اللي بيتشابك فيها خصل الشعر من قدام مع دبابيس من الورد، بتخليكي شبه النجمات والمشاهير وبتضيف لستايلك اللوك الملكي الأنيق.

في شكل ثالث بيعتمد على رفع الشعر كله وبيتساب فقط بعض الخصل تنزل على الجنبين بحرية وفي الغالب التسريحة دي بتتزين بتاج من الورد أو تاج كريستال لامع.
مهم جدًا في التسريحات الخليجية اختيار الاكسسوارات المناسبة لكل شكل فخدي بالك واختاري المناسب ليكي وللوك شعرك علشان تظهري في مظهر ملكي متألق في فرحك.

• تسريحات بالتاج:

ومن التسريحات المشهورة والمنتشرة كتير بين العرايس، هي تسريحات التاج.

وده لأنها بتبرز جمال الشعر وبتضيف بريق وتألق لوجه العروسة.

واحدة من أشهر ستايلات التاج هي التسريحة المرفوعة بالكامل مع وجود فرق بين الشعر، أو تسريحة الشعر المفرود على الكتفين والظهر، والاتنين يعتبروا من أكثر التسريحات اللي بتليق مع التيجان الكبيرة.

أما التيجان الهادية الناعمة بيليق عليها أكثر التسريحة المايلة، اللى بيتجمع فيها الشعر ناحية جنب واحد مع خصل مموجه أو إنسيابية.

وفي حالة إنك هتختاري تسريحة يوم فرحك بالتاج يبقى لازم تاخدي بالك من كام حاجة مهمة:

1- اختاري طرحة رقيقة وهادية، وبلاش الطرح المطرزة واللي فيها اكسسوارات كتير علشان متخطفش النظر وتغطي على جمال وبريق التاج.

2- لو هتلبسي تاج بلاش تختاري تسريحة معقدة، اختاري تسريحة ناعمة وهادية علشان تديكي مظهر أكثر أناقة.

3- اهتمي جدًا باختيار اكسسوارات الشعر والتاج، لأن ده اللي بيكمل اللوك بتاعك يوم الفرح فلازم يكون لايق على فستانك وتسريحة شعرك، علشان كده تختاريهم بعناية.